በመካነ ራማ ቅዱስ ገብርኤል ቤተ ክርስቲያን ኤላም የትምህርት ማዕከል

ከአኃው አንዱ አባ ሰርማጣን ቸልተኛ ነኝ እበላለሁ እጠጣለሁ እተኛለሁ የተረጋጋ ልብ የለኝም ምን ላድርግ? ባለው ጊዜ የሰጠው ምክር ነው።

እሱም ሦስት ነጥቦችን ነግሮታል።

፩ ተዐገሥ ውስተ በአትከ – በበአትህ ጽና

“ሑር ሕዝብየ ወባእ ቤተከ ወዕፁ ኆኅተከ ወተኀባዕ ኅዳጠ ምዕረ – ወገኔ ሆይ ሂድ ወደቤትህ ግባ ደጅህን ዝጋ ጥቂት ጊዜ ተሸሸግ” እንዲል ኢሳ ፳፮፥፳፤

የዚህም ምሥጢሩ “አስተጋብእ ሕዋሳቲከ – ሕዋሳትህን ሰብስበህ” ጸልይ ማለት ነው። አንድም የጸሎቱን አንቀጽ ስልቱንና ምሥጢሩን አውቀህ ጸልይ ማለት ነው።

በቅዱስ ወንጌልም የተመዘገበው በተመሳሳይ መልኩ “ባእ ቤተከ ወዕፁ ኆኅተከ ወጸሊ ኀበ አቡከ በኅቡእ የዐሥየከ ክሡተ – ወደቤትህ ግባ ደጅህን ዝጋ ወደአባትህ በሥውር ጸልይ በግልጥ ይሰጥሃል” ተብሎ ነው ማቴ ፮፥፮

፪ ወዘክህልከ ግበር ዘእንበለ ሁከት – ያለመታወክ የተቻለህን አድርግ

፫ ወዝንቱ ግብር ኅዳጥ ዘትገብሮ ከመ ግብር ብዙኅ ዘይገብሮ እንጦንዮስ በውስተ ደብሩ – በበአትህ ጸንተህ የምትሠራው ጥቂቱ ሥራ እንጦንስ በበአቱ ሆኖ እንደሚሠራው ብዙ ሥራ ነው ማለት እንደሱ ይሆንልሃል።

እስመ ዘይፈቅድ ይግበር ዘኮነ ወኢይክል ይትዔረዮ ለዘይክል ወይገብር – የታዘዘውን ሊሠራ የሚወድ ግን አልቻለው ብሎ የሚቀርበት ሰው ተችሎት የሚሠራውን ሰው ይተካከለዋልና።

የምንችለውን ማድረግ እንዴት ይገለጣል?

፩ ለትምህርተ ወንጌል/ለጉባኤ ወንጌል የምንሰጠው ክብርና ትኩረት፤

ጽድቅኬ ኢኮነ በአምጣነ ምግባረ ሥጋ – ጽድቅ በሥራ ብዛት አይደለም። 

ማርያምሰ ተልእከት በመንፈሳ ለመንፈሳውያት ዘውእቱ ሰሚዐ ቃለ እግዚእ – ማርያም በመንፈሷ መንፈሳዊነትን አገለገለች ይኸውም ቃለ እግዚአብሔር መስማት ነው።

፪ የስጦታችን ዐይነትና መጠን፤

ጽድቅኬ ኢኮነ በብዝኃ አቅርቦ – ጽድቅ ብዙ በመስጠት አይደለም

እስመ እግዚእነ በእንተ በዓልተ ክልኤ ጸሪቅ ከመ ይእቲ አብአት ፈድፋደ እምአብዕልት – ጌታችን ሁለት መሐልቅ የሰጠችውን መበለት ብዙ ከሰጡት እሷ ብዙ እንደሰጠች ተናግሯልና።

፫ ትሕትናችንን የምንገልጥበት ሁናቴ

መጽብሐዊኒ በእንተ ትሕትናሁ ጸድቀ እምፈሪሳዊ ዘበዝኀ ጾሙ ወምጽዋቱ ወጸሎቱ – ቀራጩም ስለትሕትናው ብዙ ምጽዋት፣ ጾምና ጸሎት ካለው ፈሪሳዊ ጻድቅ ሆኖ ተመልሷል።

ቴዎፍሎስ አንዱን አበ ምኔት ከሰው ተለይተህ በጽማዌ ውስጥ ሆነህ ምን አገኘህ ብሎ ቢጠይቀው፦

አነውር ርእስየ በኵሉ ጊዜ – በየጊዜው ራሴን መንቀፍን አገኘሁ ብሎታል

፬ ጥፋታችንን የምናምንበት መንገድ 

ፈያታዊኒ ዘየማን ዘለፈ ርእሶ በጊዜ ሞቱ – ፈያታዊ ዘየማን በጊዜ ሞቱ ራሱን ዘልፏል (ንሕነ ተፈደይነ በከመምግባሪነ) ብሎ

ወበእንተዝ ደለዎ ገነት – ስለዚህ ገነት ተገባው።

ይቆየን